Met die vierde aflewering in Elizabeth Wasserman se geliefde “knussie”-reeks keer ons terug na Aronspoort, die dorpie waar die koffie sterk is, die melktert altyd vars is en waar ’n mens nooit heeltemal weet wie of wat om die volgende hoek wag nie. Mevrou Smit, nou al ’n gevestigde naam onder Afrikaanse lesers, probeer steeds desperaat om net ’n doodgewone plattelandse tannie te wees. Maar soos die titel ironies aandui, is daar absoluut niks doodgewoon aan haar nie.
Storie-opsomming
Die verhaal begin op ’n manier wat onmiddellik nuuskierigheid prikkel. Mevrou Smit en dr. Tomas word saam wakker, en ek het nie regtig geweet wat aangaan nie. Is hulle getroud, saam in ’n vreemde situasie beland, of is dit maar net nog een van die onverklaarbare draaie van haar lewe? Wat wel seker is, is dat dr. Tomas steeds nie die waarheid oor haar verlede weet nie.
Intussen probeer sy steeds onder die radar leef. Haar los hemde, Birkenstocks en doelbewuste poging om onsigbaar te wees, is deel van haar strategie om in te pas. Maar haar verlede klop weer aan wanneer ’n man uit haar verlede kontak maak. As sy vir hom inligting kan verskaf, kan sy haar vryheid koop. Die versoeking is groot, want dit beteken ’n lewe sonder vrees, sonder geheime en sonder die konstante spanning.
Maar Aronspoort is nie ’n plek waar dinge ooit eenvoudig verloop nie. Daar is ‘n moord, en soos altyd, en Mevrou Smit word weer in ’n raaisel ingetrek. Nuwe karakters soos Elrien du Toit, verlangse familie van tannie Annetjie, maak hul verskyning, terwyl ou bekendes soos Hester die ystervark, nou swanger, en die Kekkel-en-Kraaiers het weer hul eie kleurvolle bydraes lewer. Die lys karakters is lank en ek moes dit self een of twee keer raadpleeg, maar elkeen het ’n unieke stem wat die dorpie se wêreld eg laat voel.
Wat het gewerk
Wat het gewerk- Die humor is deurgaans ’n hoogtepunt. Wasserman se skerp waarnemings oor plattelandse maniertjies en menslike eienaardighede is raak, maar altyd met warmte.
- Die taalgebruik is pragtig en sorg vir heerlike oomblikke van woordkuns.
- Die spanning is sterker as in die vorige boeke, veral omdat Mevrou Smit aktief probeer om haar verlede finaal af te sluit.
- Die atmosfeer is so goed vasgevang dat ek letterlik die hele tyd na melktert gesmag het.
- Die tempo is vinnig en hou jou tot die einde vas.
Wie sal dit geniet
Wie sal dit genietHierdie boek is ideaal vir lesers wat hou van ligter misdaadfiksie, sterk karakterwerk en raaisels sonder grafiese geweld. As jy reeds ’n aanhanger van die reeks is, gaan hierdie een jou net so bekoor. En as jy nuut is tot Mevrou Smit se wêreld, lees gou die ander boeke in die reeks en val in! Die boeke is vol humor, intrige en onvergeetlike karakters.
Algemene indruk en slot
Doodgewoon Mevrou Smit is ’n sprankelende, slim en heerlik vermaaklike toevoeging tot die reeks. Wasserman balanseer spanning, humor en karakterwerk met gemak en skep ’n storie wat jou laat glimlag, wonder en soms kopskud. Mevrou Smit wil net doodgewoon wees, maar haar wêreld is eenvoudig te kleurvol, te gevaarlik en te onweerstaanbaar vir gewone lewe.
’n Warm, melktert-gegeurde leeservaring wat jou laat terugkeer vir nog.
Dankie aan Penguin Boeke vir die kans om die boek te lees!
Lees ook:
Die Fantastiese Mevrou Smit deur Elizabeth Wasserman
Die Nege Lewens van Mevrou Smit deur Elizabeth Wasserman
Mevrou Smit se Reëls vir Goeie Gedrag deur Elizabeth Wasserman
